Panasonic Group ၏ စီမံခန့်ခွဲရေးအခြေခံမူဝါဒ ၁၀။.လူ့စွမ်းအားအရင်းအမြစ်များကို ပျိုးထောင်ပြီး ၎င်းတို့ကို အသုံးချခြင်း

​(၁) လူများအပေါ် Panasonic Group ၏ တွေးခေါ်ပုံ

ကုမ္ပဏီ၏ စုစုပေါင်းစွမ်းအားသည် လူတစ်ဦးစီ၏ စုပေါင်းစွမ်းအားဖြစ်သည်။ ထို့ကြောင့် စုစုပေါင်းစွမ်းအားကို တိုးမြှင့်လာစေရန်အတွက် လူတစ်ဦးစီသည် မိမိလုပ်ငန်းတွင် လုပ်သင့်သည်များကို ရှာဖွေရန်နှင့် ၎င်း၏ စွမ်းရည်အားလုံးကို တက်ကြွစွာ ပြသပြီး တိုးတက်မှုများ ပြုလုပ်ရန် လိုအပ်ပါသည်။

ထို့နောက် ဝန်ထမ်းတစ်ဦးစီ၏ ရည်မှန်းချက်များနှင့် ကုမ္ပဏီ၏ ဦးတည်ချက်တို့ ကိုက်ညီမှသာလျှင်၊ ထို့အပြင် တစ်ဦးချင်း၏ ရည်မှန်းချက်များကို တိုးချဲ့ဆောင်ရွက်ခြင်းသည် ကုမ္ပဏီ၏ ဦးတည်ချက် ဖြစ်မှသာလျှင် တစ်ဦးချင်းစီ၏ ကြိုးပမ်းအားထုတ်မှုများကို စုစည်းနိုင်ပြီး အဖွဲ့အစည်းတစ်ခုအနေဖြင့် ဖောက်သည်များထံမှရွေးချယ်ခံရပြီး အများထက်သာလွန်ကောင်းမွန်သော အလုပ်ကို လုပ်ဆောင်နိုင်မည်ဖြစ်သည်။

ထိုသို့ပြုလုပ်ရန်အတွက် အထက်လူကြီးသည် လက်အောက်ငယ်သားတစ်ဦးစီ၏ တစ်ဦးချင်း ကိုယ်ရည်ကိုယ်သွေးနှင့် အရည်အချင်းများကို ကောင်းစွာ နားလည်သဘောပေါက်ပြီး တစ်ဦးချင်းစီ၏ ထူးချွန်သောအချက်များကို တောက်ပအောင်လုပ်ကာ လုပ်ကိုင်ရကျိုးနပ်သောစိတ်ဖြင့် အရည်အချင်းများကို ပြသစေနိုင်ရန် ကြိုးစားရမည် ဖြစ်သည်။ တစ်ချိန်တည်းတွင် လက်အောက်ငယ်သားများသည် မိမိတို့ လုပ်နိုင်စွမ်းကို ယုံကြည်ပြီး မိမိကိုယ်ကို ဆက်လက်တိုးတက်အောင် လုပ်ဆောင်ရန် လိုအပ်သည်။

တစ်နည်းအားဖြင့် Panasonic Group ၏ ဖွံ့ဖြိုးတိုးတက်ရန် ကျွန်ုပ်တို့ ဝန်ထမ်းတစ်ဦးချင်းစီတွင် တာဝန်ရှိပါသည်။ Panasonic Group သည် အနာဂတ်တွင် လူ့အဖွဲ့အစည်း၏ ဖွံ့ဖြိုးတိုးတက်မှုကို ဆက်လက်အကျိုးပြုနိုင်၊ မနိုင်မှာ အလုပ်လုပ်ကိုင်နေသော ကျွန်ုပ်တို့တစ်ဦးချင်းစီ၏ စိတ်နေသဘောထားနှင့် အပြုအမူပေါ်တွင် မူတည်ပါသည်။

ဤသို့သောအကြောင်းအရင်းဖြင့် ကျွန်ုပ်တို့စီမံခန့်ခွဲမှု၏အခြေခံအုတ်မြစ်မှာ လူ့အဖွဲ့အစည်းမှ ကျွန်ုပ်တို့အား အပ်နှံထားသော အဖိုးတန် "လူ့စွမ်းအားအရင်းအမြစ်များ" ကို ပြုစုပျိုးထောင် အသုံးချရန်ဖြစ်ပြီး တည်ထောင်သူမှ "စီးပွားရေးလုပ်ငန်းသည် လူသားများဖြစ်သည်" ဟူ၍ ပြောကြားခဲ့သည်။

"စီးပွားရေးလုပ်ငန်းသည် လူသားများဖြစ်သည်" - မည်သည့်စီမံခန့်ခွဲမှုတွင်မဆို မှန်ကန်သောလူများဖြင့် အစပျိုးမှသာ ဖွံ့ဖြိုးတိုးတက်နိုင်မည်ဖြစ်သည်။ ကုမ္ပဏီတစ်ခုတွင် သမိုင်းကြောင်းနှင့် အစဉ်အလာမည်မျှပင် ကောင်းမွန်နေပါစေ၊ အစဉ်အလာကို မှန်ကန်စွာ လက်ခံသောသူများကို မရရှိနိုင်ပါက တဖြည်းဖြည်း ဆုတ်ယုတ်ကျဆင်းလာမည်ဖြစ်သည်။ စီမံခန့်ခွဲမှုအဖွဲ့အစည်း၊ နည်းလမ်းတို့မှာ အရေးကြီးသော်လည်း ထိုအရာများကို အသုံးချမည်မှာ လူသားများပင်ဖြစ်ပါသည်။ <အလယ်ပိုင်းချန်လှပ်ခြင်း> ထို့ကြောင့် စီးပွားရေးစီမံခန့်ခွဲမှုတွင် ဦးစွာပထမ ကျွန်ုပ်တို့သည် လူများကို ရှာဖွေပြီး ပြုစုပျိုးထောင်ပေးရမည်ဖြစ်ပါသည်။

(၂) ကိုယ်ပိုင်စွမ်းရည်ကို မြှင့်တင်ခြင်း

Panasonic Group ၏ အဖွဲ့ဝင်တစ်ဦးအနေဖြင့် ကျွန်ုပ်တို့သည် အခြေခံစီမံခန့်ခွဲမှုမူဝါဒ အပေါ်အခြေခံ၍ အမြဲတမ်း "ရိုးသားသောစိတ်" ဖြင့် မှန်ကန်သောတန်ဖိုးကို စီရင်ဆုံးဖြတ်ပြီး နေ့စဉ် ပြင်းထန်စွာ လက်တွေ့ဖော်ဆောင်ကာ ထိုအတွေ့အကြုံကို နှိမ့်ချစွာတွေးခေါ်မှုမှတစ်ဆင့် ကျွန်ုပ်တို့၏အရည်အချင်းများကို မြှင့်တင်ရမည်ဖြစ်သည်။

အထူးသဖြင့် "လိုက်နာသင့်သည့်ကျင့်ဝတ် (ကျင့်ဝတ် ၇ ချက်)" သည် Panasonic Group ၏ အဖွဲ့ဝင်တစ်ဦးအဖြစ် မိမိကိုယ်ကို ဖွံ့ဖြိုးတိုးတက်စေရန်အတွက် လမ်းညွှန်ချက်ဖြစ်ပြီး၊ တစ်ချိန်တည်းမှာပင် လူ့အဖွဲ့အစည်း ဖွံ့ဖြိုးတိုးတက်ရေးကို အကျိုးပြုလိုသော လုပ်ငန်းရှင်တစ်ဦး အနေဖြင့် ပိုမိုကောင်းမွန်စွာ နေထိုင်နိုင်စေရန် လမ်းညွှန်ချက်လည်း ဖြစ်ပါသည်။ ဥက္ကဌဟောင်း Arataro Takahashi သည် အဆိုပါ လက်တွေ့ဖော်ဆောင်ခြင်း၏ အဓိပ္ပာယ်ကို အောက်ပါအတိုင်း ဆွေးနွေးထားပါသည်။

"ကျင့်ဝတ် ၇ ချက်" ဆိုတာ စီမံခန့်ခွဲမှုအခြေခံမူဝါဒရဲ့ နောက်ကွယ်မှ ကျင့်ဝတ်တွေဖြစ်ပါတယ်။ ဥပမာအနေနဲ့၊ "လူ့အဖွဲ့အစည်းအတွက် ပံ့ပိုးကူညီခြင်း" ရဲ့ အကြောင်းအရာဟာ "အခြေခံမူဝါဒ" ကို လက်တွေ့ဖော်ဆောင်ခြင်းဖြစ်ပြီး၊ ဒါကို ခိုင်မာစွာ လက်တွေ့လက်တွေ့ဖော်ဆောင်ခြင်းဟာ အရည်အသွေး၊ ကုန်ကျစရိတ်နဲ့ ဝန်ဆောင်မှုပိုင်းမှာ ပြိုင်ဘက်ကင်းဖြစ်လာပြီး ဖောက်သည်ထံမှ ရွေးချယ်ခံရသည့် အလုပ်ကို လုပ်ခြင်းကို ဆိုလိုပါတယ်။ ဒီလိုနားလည်လိုက်မယ်ဆိုရင် "ကျွန်ုပ်တို့ ထုတ်လုပ်နေတဲ့ ထုတ်ကုန်တွေဟာ လူ့အဖွဲ့အစည်းအတွက် အမှန်တကယ် အကျိုးပြုနေသလား၊ အခုလက်ရှိ လုပ်နေတဲ့နည်းအတိုင်း လုပ်လို့ အဆင်ပြေရဲ့လား" စတဲ့ ဆင်ခြင်သုံးသပ်ချက်များကို အဆက်မပြတ် ပြုလုပ်ရပါမယ်။ ဒီလို ဆင်ခြင်သုံးသပ်ချက်တွေနဲ့ စစ်ဆေးမှုတွေကို နေ့စဉ်နှင့်အမျှ ထပ်ခါထပ်ခါ ပြုလုပ်ပြီး စုဆောင်းခြင်းဖြင့် ဉာဏ်ရည်ဉာဏ်သွေးနဲ့ တီထွင်ကြံဆမှုများ ပေါက်ဖွားလာပြီး အခြေခံမူဝါဒဟာ အလုပ်မှာ တိကျစွာ ထင်ဟပ်လာမှာဖြစ်ပါတယ်။ ဒါကြောင့် ရှင်းလင်းပြတ်သားတဲ့ အခြေခံမူဝါဒမရှိဘဲ လူသားတွေကို ပြုစုပျိုးထောင်ပေးဖို့လည်း မဖြစ်နိုင်ပါဘူး။

ကုမ္ပဏီများသည် လူ့စွမ်းအားအရင်းအမြစ်များ ပျိုးထောင်ရာတွင် သင့်လျော်ပြီး မှန်ကန်စွာ ပြုစုပျိုးထောင်ပေးရန် တာဝန်ရှိပါသည်။ တစ်ဖက်တွင် ကျွန်ုပ်တို့ တစ်ယောက်ချင်းစီတွင်လည်း မြင့်မားသောရည်မှန်းချက်ထား၍ မိမိဖြစ်လိုသည့်အရာများအတွက် ဆက်လက်ကြိုးစားကြရမည် ဖြစ်သည်။

(၃) လူ့စွမ်းအားအရင်းအမြစ် ပျိုးထောင်ရေးအယူအဆ

တည်ထောင်သူသည် Panasonic Group ၏ လူ့စွမ်းအားအရင်းအမြစ် ပျိုးထောင်ရေး၏ အရေးပါမှုကို "ကုန်ပစ္စည်းများမထုတ်လုပ်မှီ လူသားများကို ပျိုးထောင်ပါ" ဟူသော စကားလုံးဖြင့် ဖော်ပြခဲ့ပါသည်။ ကုန်ပစ္စည်းကောင်းတစ်ခု ထုတ်လုပ်ရန်အတွက် ထိုကုန်ပစ္စည်းနှင့် သင့်လျော်သောသူကို ဦးစွာ ဖန်တီးရန် လိုအပ်သည်ဟု ယုံကြည်ထားသည်။

ဤသို့ဆိုရင် လူသားများကို မည်ကဲ့သို့ ပြုစုပျိုးထောင်ကာ အသုံးချမည်နည်း။ အဆိုပါမေးခွန်းအတွက် အခြေခံအတွေးအခေါ်မှာ၊ စီမံခန့်ခွဲရေးအခြေခံမူဝါဒကို ကောင်းစွာနားလည် သဘောပေါက်ပြီး ၎င်းတို့ကို အခြေခံ၍ အလုပ်ကို အလေးအနက်ထားလုပ်ဆောင်ကာ နှိမ့်ချစွာ တွေးတောဆင်ခြင်ပြီး နေ့စဉ်တိုးတက်ရေးကို ဆက်တိုက်ရည်မှန်းလျက်ရှိသည့် "လူ့စွမ်းအား အရင်းအမြစ်များ" ကို ပြုစုပျိုးထောင်ပေးရန် ဖြစ်သည်။

လူ့စွမ်းအားအရင်းအမြစ်များ ပျိုးထောင်ရာတွင် အရေးကြီးသောအချက်မှာ စိတ်ပိုင်းဖြတ်၍ အလုပ်ကိုလက်အောက်ငယ်သားများထံ အလုပ်အပ်နှံခြင်းဖြစ်သည်။ ဤသည်မှာ "ကိုယ်တိုင် တာဝန်ယူမှုရှိသော စီမံခန့်ခွဲမှု" ၏ သော့ချက်လည်းဖြစ်သည်။ လူများကို ပြုစုပျိုးထောင်ပေးသည်မှာ အလုပ်၏လုပ်ငန်းခွင်ဖြစ်ပြီး အလုပ်ကို ပိုမိုကောင်းမွန်အောင် လုပ်ဆောင်နိုင်စေရန်အတွက် လုပ်ငန်းခွင်တွင် ကိုယ်ပိုင်အလုပ်ဟု မှတ်ယူ၍ လုပ်ကိုင်ပြီး၊ ကိုယ်တိုင် စဉ်းစားတွေးခေါ်၍ လက်တွေ့လုပ်ဆောင်ကာ သင်ယူသွားရန် လိုအပ်သည်။

အပ်နှံခြင်းဆိုသည်မှာ အရာအားလုံးကို လက်အောက်ငယ်သားများထံ ပစ်ထားခဲ့ခြင်းဟု ဆိုလိုခြင်းမဟုတ်ပါ။ အထက်လူကြီးသည် နောက်ဆုံးအထိတာဝန်ရှိသည်ဟု မိမိကိုယ်ကို သတိပြုရင်း လက်အောက်ငယ်သားများအား အမှီအခိုကင်းစွာ ကိုယ်တိုင်တွေးတောပြီး ဆက်လက်တိုးတက်စေရန် အတွက် တိုက်တွန်းရန် လိုအပ်ပါသည်။ အရာရာတိုင်းကို သင်ကြားပေးရမည်မဟုတ်ဘဲ ကိုယ်တိုင်တွေးခေါ်နိုင်စေရန်၊ သတိပြုမိစေရန်၊ ၎င်းတို့ကိုယ်တိုင် ပြုလုပ်နိုင်ရန်အတွက် ပြောဆိုဆက်ဆံရေးသည် အလွန်အရေးကြီးသည်။

တစ်ခါတရံတွင် ကာယကံရှင်အကြောင်းကို စဉ်းစားပြီး ကြမ်းကြမ်းတမ်းတမ်း ဆက်ဆံရန် လိုအပ်သော်လည်း အရေးအကြီးဆုံးမှာ လက်အောက်ငယ်သားတိုင်းအား မိမိအထက်လူကြီးကို ယုံကြည်စိတ်ချပြီး မိမိတိုးတက်မှုအတွက် စိတ်အေးချမ်းသာစွာ အလုပ်လုပ်ကိုင်နိုင်စေရန် ရိုးသားမှုနှင့် ချစ်ခင်ကြင်နာစွာဆက်ဆံရမည်ဖြစ်သည်။

ဤကဲ့သို့ "စောင့်ကြည့်၍ အပ်နှံခြင်း" သဘောထားဖြင့် အထက်လူကြီးက တာဝန်များကို ကျေပွန်အောင် ထမ်းဆောင်နိုင်ရန် လက်အောက်ငယ်သားများရှေ့တွင်ဦးဆောင်ပြီး အနာဂတ်တွင် ဖြစ်ပေါ်လာနိုင်သည့် အန္တရာယ်များကို လေးလေးနက်နက် စဉ်းစားရန်လည်း လိုအပ်ပါသည်။ ထို့အပြင် လက်အောက်ငယ်သားများထံမှ သင်ယူနိုင်သည့် အရာများရှိပြီး အထက်လူကြီးတစ်ယောက် အနေဖြင့်လည်း တိုးတက်မှုကို ဖြစ်ပေါ်စေနိုင်ပါသည်။

လက်တွေ့ဖော်ဆောင်ခြင်း၏ ဥပမာအနေဖြင့် ပြောရလျှင် Saga စက်ရုံတည်ထောင်ခြင်း၏ အပိုင်းဖြစ်သည်။ ဥက္ကဌဟောင်း Arataro Takahashi သည် ၁၉၅၅ ခုနှစ်များနှောင်းပိုင်းတွင် Saga စီရင်စုရှိ Kyushu Matsushita Electric အတွက် ဓာတ်ခဲခြောက်စက်ရုံကို တည်ထောင်ရန် အတွေ့အကြုံ မရှိသူ အသက် ၃၀ ဝန်းကျင် လူငယ်နှစ်ဦး ကို ရွေးချယ်ခဲ့ပါသည်။ စက်ရုံတည်ဆောက်ရေးလုပ်ငန်းတွင် အတွေ့အကြုံမရှိသူ ထိုလူငယ် နှစ်ဦးကို စက်ရုံသစ် တည်ဆောက်ခြင်း၊ စက်ပစ္စည်းတည်ဆောက်မှုမှစ၍ ထုတ်လုပ်မှုစတင်သည့်အချိန်အထိ အရာအားလုံးကို အပ်နှံခဲ့ပါသည်။

ဥက္ကဌဟောင်း Takahashi သည် အသေးစိတ်အခြေအနေများကို မသတ်မှတ်ဘဲ အခြေခံ အယူအဆကိုသာ ပြသခဲ့ပြီး တစ်ဖက်တွင်လည်း အဆောက်အဦး၏ မူလဆောက်လုပ်ရေး ကုန်ကျစရိတ်ထက် ထက်ဝက်လျှော့ချရန် ညွှန်ကြားခြင်းကဲ့သို့သော တင်းကျပ်သော တောင်းဆိုမှုများ ကိုလည်း တင်ပြခဲ့သည်။ သို့သော်လည်း ၎င်းတို့နှစ်ဦးသည် ရုန်းကန်ကာ ဉာဏ်ရည်ဉာဏ်သွေးနှင့် တီထွင်ကြံဆမှုများဖြင့် ကြိုးစားခဲ့ကြပြီးနောက် ရလဒ်အနေဖြင့် ၎င်းတို့သည် ကနဦးဘတ်ဂျက်ထက် နည်းသောငွေပမာဏဖြင့် စက်ရုံကို တည်ထောင်နိုင်ခဲ့ပါသည်။ ထို့နောက် နောက်ပိုင်းတွင်လည်း ထိုနှစ်ဦးသည် စီမံခန့်ခွဲသူများအနေဖြင့် နိုင်ငံရပ်ခြားမှ စက်ရုံများ တည်ထောင်ခြင်းနှင့် အုပ်စုကုမ္ပဏီများ၏ စီမံခန့်ခွဲရေးတွင် ပံ့ပိုးကူညီခဲ့ကြသည်။

လူ့စွမ်းအားအရင်းအမြစ်ကို ပျိုးထောင်ခြင်းသည် အထက်လူကြီး၏ အရေးကြီးဆုံးအလုပ် ဖြစ်သည်။ Panasonic Group သည် "စံပြလူ့အဖွဲ့အစည်း" ဆီသို့ဦးတည်ပြီး လူ့အဖွဲ့အစည်း၏ ဖွံ့ဖြိုးတိုးတက်မှုအတွက် ဆက်လက်ပံ့ပိုးကူညီသွားရန် ရည်မှန်းလျက်ရှိသည်။ ဤကဲ့သို့ ကျယ်ပြန့်သော အတွေးအခေါ်များနှင့် ရည်မှန်းချက်များချမှတ်ထားသည့်အနက် ကျွန်ုပ်တို့ တစ်ဦးစီ၏ လုပ်ငန်းတွင် ပါဝင်ပတ်သက်နေသည့် အချိန်ကာလမှာ တစ်ခဏမျှသာဖြစ်သည်။ ထို့ကြောင့် လုပ်ငန်းကို အမြဲမပြတ်ဆက်လက်လုပ်ကိုင်သွားမည့်ရှုထောင့်မှကြည့်လျှင်လည်း အထက်လူကြီးသည် နောက်မျိုးဆက်ကို အပ်နှင်းမည့် လက်အောက်ငယ်သားများကို ပြုစုပျိုးထောင်ပေးရမည်ဖြစ်သည်။

အထက်လူကြီးတွင် လက်အောက်ငယ်သားများကို မိမိထက်သာအောင် လမ်းညွှန်ပေးရန် တာဝန်ရှိပါသည်။ လူအဖွဲ့အစည်း ဆင့်ကဲပြောင်းလဲမှု အရှိန်အဟုန် အရှိန်မြှင့်လာသည်နှင့်အမျှ ယခုအထိ အသုံးပြုခဲ့သောနည်းလမ်းများသည် နောက်မျိုးဆက်များအတွက် အသုံးဝင်လိမ့်မည် မဟုတ်ပါ။ လက်အောက်ငယ်သားတစ်ဦးမှ ရာထူးတစ်ခုကို တာဝန်ယူသည့်အခါ ခက်ခဲသော အလုပ်များကို အချိန်မရွေး လိုက်လျောညီထွေဖြစ်အောင် တာဝန်ယူဆောင်ရွက်စွမ်း ရှိစေရန်အတွက် ပျိုးထောင်ရန်လိုအပ်သည်။

ဤအချက်များအပြင် လူများကို ပျိုးထောင်ခြင်း၊ အသုံးချခြင်းနှင့်ပတ်သက်၍ အခြားသော အဖိုးတန်အကြံဉာဏ်များစွာကို ကျွန်ုပ်တို့အတွက် ချန်ထားခဲ့ပါသည်။ လူသားအရင်းအမြစ် ပျိုးထောင်ရေးနှင့် သင်၏ကိုယ်ပိုင် လေ့လာမှုများတွင် ၎င်းတို့ကို သေချာပေါက် အသုံးချစေလိုပါသည်။