Panasonic Group ၏ စီမံခန့်ခွဲရေးအခြေခံမူဝါဒ ၂။ Panasonic Group ၏ တာဝန်နှင့် ယခုလုပ်သင့်သောအရာ

တည်ထောင်သူသည် လုပ်ငန်း၏ စစ်မှန်သောတာဝန်ကို ဆက်တိုက်တွေးတောခဲ့ပြီး ၁၉၃၂ ခုနှစ် မေလ ၅ ရက်နေ့တွင် ထိုအချိန်ရှိ ဝန်ထမ်းအားလုံးကို စုဝေးစေပြီး အားကောင်းသော ကြေညာချက်တစ်ခုကို ထုတ်ပြန်ခဲ့သည်။ Panasonic Group သည် ထိုကြေညာချက်ကို "စစ်မှန်သောတာဝန်ကိုသိရှိခြင်း" ဟူသော အဓိပ္ပာယ်ဖြင့် "တည်ထောင်ခြင်းတာဝန်" ဟု ခေါ်ဆိုကြသည်။

တည်ထောင်သူသည် "ကျွန်ုပ်တို့ စက်မှုလုပ်ငန်းရှင်များ၏ တာဝန်မှာ ဆင်းရဲမွဲတေမှုကို ပပျောက်စေကာ ကြွယ်ဝချမ်းသာလာစေခြင်းဖြစ်ပြီး ဤအတွက်သာလျှင် လုပ်ငန်းသည် ကြီးပွားချမ်းသာခွင့်ရရှိမည်" ဟု ပြောကြားခဲ့ပြီး အဆိုပါကာလ ဂျပန်နိုင်ငံ၏ ရေပိုက်လိုင်းမှ ရေကဲ့သို့ တတ်နိုင်သမျှ ပစ္စည်းများ၏ ဈေးနှုန်းကို လျှော့ချခြင်း တစ်နည်းအားဖြင့် "ပစ္စည်းများကို ဆက်တိုက်ထုတ်လုပ်ခြင်း" ဖြင့် ဆင်းရဲမွဲတေမှုကို ပပျောက်စေမည်ဟု ပြောကြားခဲ့သည်။

သို့သော် ဤ "ရေပိုက်လိုင်းဒဿန" တွေးခေါ်ပုံထည့်သွင်းခဲ့သော တည်ထောင်သူ၏ စစ်မှန်သော ရည်ရွယ်ချက်ကို "လူသားများ၏ ပျော်ရွှင်မှုကို ကိုယ်နှင့်စိတ်နှစ်မျိုးလုံး ချမ်းသာမှုဖြင့် ထိန်းသိမ်းထားပြီး ဆက်လက်တိုးတက်နေသည်။ စိတ်ပိုင်းဆိုင်ရာတည်ငြိမ်အေးချမ်းမှုနှင့် ရုပ်ပိုင်းဆိုင်ရာပစ္စည်း အထောက်အပံ့များ ပေါင်းစပ်မှုဖြင့် လူသားများ၏ ပျော်ရွှင်မှုသည် ပထမဆုံးအနေဖြင့် တည်ငြိမ်လာမည်" ဟူသော စကားဖြင့် ဖော်ပြခဲ့သည်။

တည်ထောင်သူသည် ဤတာဝန်ကို အောင်မြင်စေရန်အတွက် ၂၅ နှစ် တစ်ဖြတ်အနေဖြင့် ဆယ်ဖြတ်ဖြတ်ကာ "ပျော်ရွှင်ဖွယ်ရာနယ်မြေ"၊ တစ်နည်းအားဖြင့် "စံပြလူ့အဖွဲ့အစည်း" တည်ထောင်ရန် ရည်ရွယ်၍ "၂၅၀ နှစ် စီမံချက်" ကိုချမှတ်ခဲ့သည်။ ထို့အပြင် ၂၅၀ နှစ် စီမံချက်သည် ပထမတစ်ကြိမ် ၂၅၀ နှစ်ဖြင့် ပြီးဆုံးမည်မဟုတ်ဘဲ နောက်နှစ်ပေါင်း ၂၅၀ ကြာလျှင်လည်း ပို၍ကောင်းမွန်သောစံနာမူနာ ဖြစ်စေရန် အဆိုပါခေတ်၏ စံနှုန်းနှင့်ကိုက်ညီသောနည်းလမ်းဖြင့် ရှေ့ဆက်တိုးလုပ်ဆောင်သင့်သည်ဟု ရှင်းပြခဲ့သည်။

"ရေပိုက်လိုင်းဒဿန" ကို ရှင်းပြခဲ့သည်မှာ လွန်ခဲ့သောနှစ်ပေါင်း ၉၀ ခန့်ကဖြစ်သော်လည်း ကိုယ်နှင့်စိတ်နှစ်မျိုးလုံး ချမ်းသာစေမည့် အတွေးအခေါ်မှာ ယနေ့ခေတ်ကာလထိတွင် ခေတ်မီလျက် ရှိသည်။

လက်တွေ့တွင် ဖွံ့ဖြိုးပြီးနိုင်ငံများကို အဓိကထား၍ လူ့အဖွဲ့စည်းကို ရုပ်ပိုင်းဆိုင်ရာပစ္စည်းများဖြင့် ဖြည့်ဆည်းလာခဲ့သော်လည်း အထူးသဖြင့် တစ်နှစ်ပြီးတစ်နှစ် လျင်မြန်စွာ သဘာဝပတ်ဝန်းကျင် ပျက်စီးလာခြင်းနှင့် စွမ်းအင်ကုန်ခမ်းလာခြင်းကို စဥ်းစားကြည့်ပါက ကျွန်ုပ်တို့ သားသမီး၊ မြေးနှင့် နောက်မျိုးဆက်များအတွက် ယခုကဲ့သို့သော ကြွယ်ဝသောနေထိုင်မှု ဆက်လက်ရရှိရေးတွင် အလွန်စိုးရိမ်တကြီးဖြစ်ရသည်။

ကျွန်ုပ်တို့သည် ယနေ့ထက်တိုင် ချမ်းသာကြွယ်ဝမှုကို လိုက်စားရင်းဖြင့် ရုပ်ပိုင်းဆိုင်ရာပစ္စည်း ပံ့ပိုးခြင်းကို အဓိကထား၍ နေထိုင်လာခဲ့ကြသော်လည်း "စံပြလူ့အဖွဲ့အစည်း" မှ ဝေးကွာသော အခြေအနေဖြစ်နေကြောင်းကို သိရှိရမည်ဖြစ်သည်။ သို့သော် လာရာလမ်းကို ပြန်ပြောင်းလှည့်နိုင်မည် မဟုတ်ပါ။ ကျွန်ုပ်တို့ လက်ရှိ ရှိနေသည့်နေရာမှ "ကိုယ်ရောစိတ်ပါတစ်သားတည်း" တစ်နည်းအားဖြင့် ကိုယ်နှင့် စိတ်နှစ်ခုလုံးကို ချမ်းသာစေမည့် "စံပြလူ့အဖွဲ့အစည်း" ၏ ပုံစံကို စိတ်ကူးပုံဖော်ပြီး ၎င်းအား အကောင်အထည်ဖော်ရန် ရှေ့ဆက်လုပ်ဆောင်ရမည်ဖြစ်သည်။

ကျွန်ုပ်တို့သည် "စံပြလူ့အဖွဲ့အစည်း" ဖော်ဆောင်နိုင်ရန် လူ့အဖွဲ့အစည်းပြဿနာအချို့ကို ထိပ်တိုက်ရင်ဆိုင်၍ ဖြေရှင်းရန်အတွက် ပံ့ပိုးကူညီသွားရန် လိုအပ်သည်။ အထူးသဖြင့် ၂၁ ရာစုနှစ်တွင် ကမ္ဘာ့ပတ်ဝန်းကျင်ဆိုင်ရာ ပြဿနာများကို ဦးစားပေးကိုင်တွယ်သင့်သည်။

Panasonic Group သည် ၁၉၉၁ ခုနှစ်တွင် ကမ္ဘာ့ပထမဆုံးအဖြစ် သဘာဝပတ်ဝန်းကျင်ဆိုင်ရာ ပဋိဉာဉ်တစ်ရပ်ကို ပြဋ္ဌာန်းခဲ့ပြီး အဆိုပါကိစ္စရပ်နှင့် အချိန်ကြာရှည်စွာ ရင်ဆိုင်ခဲ့ရသည်။ နောက်ပိုင်းတွင်လည်း သဘာဝပတ်ဝန်းကျင်ဆိုင်ရာပြဿနာများ ဖြေရှင်းခြင်းကို ဦးဆောင်သည့် ကုမ္ပဏီအနေဖြင့် တတ်စွမ်းသမျှ ထုတ်ကုန်များနှင့် ဝန်ဆောင်မှုမှတစ်ဆင့် သဘာဝပတ်ဝန်းကျင်ဆိုင်ရာ ဝန်ထုပ်ဝန်ပိုးကို လျှော့ချခြင်းနှင့် ထုတ်လုပ်မှုလုပ်ငန်းများတွင် စွမ်းအင်လျှော့ချခြင်းအပါအဝင် အမျိုးမျိုးသောရှုထောင့်မှနေ၍ တက်ကြွသောကြိုးပမ်းအားထုတ်မှုကို ဆက်လက်လုပ်ဆောင်ရန် လိုအပ်ပါသည်။