Panasonic Group ၏ စီမံခန့်ခွဲရေးအခြေခံမူဝါဒ ၇။ ဖောက်သည်၏ အရေးပါမှု

လုပ်ငန်းအားလုံးတွင် ဖောက်သည်မှ ထုတ်ကုန်များနှင့် ဝန်ဆောင်မှုများကို ရွေးချယ်ခြင်း၊ ဝယ်ယူခြင်းတို့ ပါဝင်ပါသည်။ ဤသည်မှာ ရောင်းကုန်သွားသော ထုတ်ကုန်များပင်ဖြစ်စေ၊ ဖောက်သည်များအတွက် စာချုပ်ချုပ်၍ ပုံမှန်ပေးချေရန် လိုအပ်သည့် ဝန်ဆောင်မှုများပင်ဖြစ်စေ အလားတူပင်ဖြစ်သည်။

ထို့ကြောင့် ဤကဲ့သို့သော အဖိုးတန်ဖောက်သည်များအပေါ် အမြဲ မိမိကိုယ်ကို ဖောက်သည်အနေဖြင့် တွေးတောပြီး၊ စိတ်ရင်းမှန်ဖြင့် ဝန်ဆောင်မှုပေးကာ တစ်စုံတစ်ခုဖြစ်ပွားပါက ချက်ချင်းသင့်လျော်စွာ တုံ့ပြန်ရမည်မှာ စီးပွားရေးလုပ်ငန်းတွင် သဘာဝပင်ဖြစ်ပါသည်။

ဤသို့သောသဘောထားကို အခြားနေရာများထက် ပိုမိုခိုင်မာစွာ လက်တွေ့ကျင့်သုံးနိုင်မှသာလျှင် ဖောက်သည်များ၏ယုံကြည်မှုကို ရရှိပြီး ဖောက်သည်များမှ မိမိတို့အား ဆက်လက်ရွေးချယ်သွားမည် ဖြစ်သည်။ ထို့အပြင် ဖောက်သည်များထံမှ "Panasonic ကို ရွေးချယ်ခဲ့တာ မှန်ကန်သွားတယ်" ဟူသော စကားသံများပျံ့နှံ့လာပါက ကျွန်ုပ်တို့၏လုပ်ငန်းတိုးတက်မှုနှင့် ဖွံ့ဖြိုးတိုးတက်မှုကို ခွင့်ပြုချက် ရသည်ဟု ဆိုလိုပါသည်။

တည်ထောင်သူသည် လုပ်ငန်းလုပ်ဆောင်ခြင်းအပေါ် သူ၏သဘောထားနှင့် ပတ်သက်၍ စကားပေါင်းများစွာ ချန်ထားခဲ့သော်လည်း ထိုအနက်မှ "ဖောက်သည်၏ အရေးပါမှု" ဟူသော အယူအဆအကြောင်းကို အောက်ပါအတိုင်း ပြောဆိုထားသည်။

・ဖောက်သည်များအား ပျော်ရွှင်မှုပေးခြင်းတွင် လုပ်ငန်းတည်ရှိမှုတန်ဖိုးရှိသည်

ဖောက်သည်အား ထုတ်ကုန်ပစ္စည်းရောင်းချခြင်းဆိုသည်မှာ ကုန်ပစ္စည်း၏တန်ဖိုးကို ဖောက်သည်မှ လက်ခံယုံကြည်စေရုံသာမက ပျော်ရွှင်မှုနှင့် လုံခြုံမှုကို ခံစားရရှိစေခြင်းတို့ကိုလည်း ဆိုလိုပါသည်။ ဤပျော်ရွှင်မှုတွင် ကြီးမားသောတန်ဖိုးရှိပါသည်။ ထို့ကြောင့် မည်ကဲ့သို့သော ဆက်သွယ်မှုနှင့် ဝန်ဆောင်မှုများပေးရမည်ကို သေချာစဉ်းစားရန် လိုအပ်ပါသည်။ ဤသို့လုပ်ခြင်းအားဖြင့် ကျွန်ုပ်တို့လည်း အမြတ်အပြင် ပျော်ရွှင်မှုကိုလည်း ရရှိနိုင်မည်ဖြစ်ပါသည်။

・ဖောက်သည်၏ မန်နေဂျာဖြစ်လာခြင်း

စီးပွားရေးလုပ်ငန်းလုပ်ရာတွင် ကိုင်တွယ်သည့် ထုတ်ကုန်ပစ္စည်းမျာကို သေချာဆန်းစစ်ပြီး ယုံကြည်မှုရှိရှိဖြင့် ရောင်းချရန်အရေးကြီးပါသည်။ သို့သော် ထိုသို့လုပ်ဆောင်သည့်အခါတွင် သင်သည်ဝယ်ယူသူအနေဖြင့်ဖြစ်လာပြီး ဖောက်သည်၏ မန်နေဂျာ* ဖြစ်သကဲ့သို့ ထုတ်ကုန်များကို သေချာစစ်ဆေးပေးရမည်မှာ အရေးကြီးဆုံးအချက်ဖြစ်ပါသည်။ မိမိကိုယ်တိုင်က ဖောက်သည်၏မန်နေဂျာဟု စဥ်းစားပါက ဖောက်သည်မှာ အခု မည်သည်ကိုလိုအပ်နေသည်၊ မည်သို့သောအရာကို လိုချင်နေသည်ကို သိရှိရမည်ဖြစ်ပြီး ကုန်ပစ္စည်းများကို ရှာဖွေစစ်ဆေးပေးကာ ဖောက်သည်အတွက် အကျိုးအမြတ်ရှိစေရန် ထည့်သွင်းစဉ်းစားပေးရာတွင် ပိုမိုလွယ်ကူလာမည် ဖြစ်သည်။

*မန်နေဂျာ - စတိုးဆိုင်ရှိ အလုပ်သမား (ဝန်ထမ်းများ) အကြား အရောင်းနှင့် စီမံခန့်ခွဲခြင်းများကဲ့သို့သော စတိုးဆိုင်အားလုံးကို ကြီးကြပ်သူ။

・ဖောက်သည်များကို ဂရုစိုက်သောစိတ်ထားမှ လုပ်ငန်းဖွံ့ဖြိုးတိုးတက်လာခြင်း

ကြိုးစားပမ်းစား ဖန်တီးထားသော ထုတ်ကုန်ပစ္စည်းများကို ဧည့်သည်များထံမှ ချီးကျူးဂုဏ်ပြုခံရခြင်း၏ ပျော်ရွှင်မှုသည် ဝယ်ယူခံရခြင်း၏ ပျော်ရွှင်မှုထက်သာလွန်ပါသည်။ ကုမ္ပဏီတစ်ခုမှာ မည်မျှပင်ကြီးမားသည်ဖြစ်စေ ဝန်ထမ်းတစ်ဦးချင်းစီသည် ဖောက်သည်များ၏ တောင်းဆိုချက်များကို နှိမ့်ချစွာလိုက်နာရန် အရေးကြီးပါသည်။ ထိုသို့ပြုလုပ်ခြင်းဖြင့် ဖောက်သည်များထံမှ နောက်ထပ်ပံ့ပိုးကူညီမှုများရရှိမည်ဖြစ်ပြီး တစ်ဆင့်ပြီး တစ်ဆင့်ပံ့ပိုးကူညီမှုများ ရရှိခြင်းဖြင့် ကုမ္ပဏီသည် ဖွံ့ဖြိုးတိုးတက်လာမည်ဖြစ်သည်။

・ဖောက်သည်များကို ဆက်ဆံရေးညံ့ဖျင်းသောကုမ္ပဏီများ ပြိုလဲသွားခြင်း

စျေးနှုန်းတူသည့် အုဒွန်းခေါက်ဆွဲဆိုင် နှစ်ဆိုင်ရှိခဲ့လျှင် စေတနာထားပြီး ဖောက်သည်များကို တန်ဖိုးထားသောဆိုင်နှင့် ဖောက်သည်များကို ဆက်ဆံရေးညံ့ဖျင်းသောဆိုင် လူတွေ မည်သည့်ဆိုင်တွင် စုပြုံမည်နည်းဟု ပြောရမယ်ဆိုလျှင် ဖောက်သည်များကို တန်ဖိုးထားသောဆိုင်တွင်ပင်ဖြစ်လိမ့်မည်။ Matsushita Electric သည် မည်မျှပင်ကြီးမားသည်ဖြစ်ပါစေ ၎င်း၏အသွင်အပြင်သည် ဖောက်သည်များကို တန်ဖိုးထားသော အုဒွန်းခေါက်ဆွဲဆိုင်၏ သဘောထားနှင့် ကွဲလွဲနေမည်မဟုတ်ပါ။ လူအရေအတွက်နှင့် အရောင်းပမာဏကို ဂုဏ်ယူရသည့် အခြေအနေမျိုးတွင် လူတိုင်းသည် သတိမကပ်ဘဲ ဖောက်သည်များအပေါ် ဆက်ဆံရေးညံ့ဖျင်းလျှင် ထိုကုမ္ပဏီသည် ပြိုလဲသွားလိမ့်မည်ဟု ထင်ပါသည်။

ကုမ္ပဏီ မည်မျှပင်ကြီးကြီး၊ အဖွဲ့အစည်းက ကြီးပွားတိုးတက်ပြီး မည်မျှပင် ရှုပ်ထွေးနေပါစေ ကျွန်ုပ်တို့သည် ဖောက်သည်များကို ကောင်းစွာ ဂရုစိုက်သည့်စိတ်ထားဖြင့် နေ့စဉ် လုပ်ငန်းခွင်တွင် လုပ်ကိုင်ရမည်ဖြစ်သည်။ ထို့အပြင် လုပ်ငန်းတစ်ခုစီသည် မတိုးတက်နေပါက ဖောက်သည်ဦးစားပေး ဟူသောအတွေးဖြင့် လုပ်ငန်းကို မလုပ်ဆောင်နိုင်နေကြောင်း၊ တစ်နေရာရာတွင် မှားယွင်းနေသောကြောင့် ဖောက်သည်၏ယုံကြည်မှုကို အပြည့်အဝ ရရှိမနေဟု တွေးတော၍ အကြောင်းရင်းကို စုံစမ်းစစ်ဆေးပြီး စောလျင်စွာ ပြုပြင်ရပါမည်။