Panasonic Group ၏ စီမံခန့်ခွဲရေးအခြေခံမူဝါဒ ၈။ ကိုယ်တိုင် တာဝန်ယူမှုရှိသော စီမံခန့်ခွဲမှု

Panasonic Group တွင် စီမံခန့်ခွဲမှုသည် စီမံခန့်ခွဲသူတစ်ခုတည်း၏ တာဝန်မဟုတ်ပါ။ ကျွန်ုပ်တို့ ဝန်ထမ်းတစ်ဦးစီသည် မိမိတို့ကိုယ်ကို မိမိတို့အလုပ်၏ တာဝန်ခံ၊ စီမံခန့်ခွဲသူအဖြစ် သတ်မှတ်ကာ အလုပ်လုပ်ကိုင်ခြင်း၊ ကုမ္ပဏီ၏မူဝါဒကို လိုက်နာခြင်းဖြင့် လွတ်လပ်သော စီမံခန့်ခွဲမှုကို တာဝန်သိစွာ ဆောင်ရွက်လျက်ရှိသည်။ ဤသည်မှာ ကိုယ်တိုင် တာဝန်ယူမှုရှိသော စီမံခန့်ခွဲမှု၏ အခြေခံအယူအဆ ဖြစ်သည်။

အဖွဲ့အစည်းတိုင်းတွင် လူတစ်ဦးစီသည် အဆင့်မြင့်အဖွဲ့အစည်းများ၏ အတွေးအခေါ်နှင့် မူဝါဒများကို အခြေခံ၍ မိမိတို့ကိုယ်ပိုင်လုပ်ငန်းဖြစ်သည်ဟူသော အသိတရားဖြင့် အလုပ် လုပ်ဆောင်ရန် လိုအပ်ပြီး မိမိကိုယ်ကိုတိုးတက်အောင် ပြုလုပ်ရန် လိုအပ်ပါသည်။ ကိုယ်တိုင် တာဝန်ယူမှုရှိသော စီမံခန့်ခွဲမှုသည် Panasonic Group ၏ စီမံခန့်ခွဲမှု၏ အခြေခံအုတ်မြစ်များထဲမှ တစ်ခုဖြစ်ပြီး ၎င်းသည် လူ့စွမ်းအားအရင်းအမြစ်များကို ပြုစုပျိုးထောင်ပေးသည့် ယဉ်ကျေးမှု တစ်ခုလည်းဖြစ်သည်။

လုပ်ငန်းတွင် ကိုယ်တိုင် တာဝန်ယူမှုရှိသော စီမံခန့်ခွဲမှု၏ သော့ချက်အနေဖြင့် တည်ထောင်သူသည် "ပထမဦးစွာ၊ စီမံခန့်ခွဲသူကိုယ်တိုင်က ရည်မှန်းချက်နှင့် စီမံခန့်ခွဲမှုဆိုင်ရာ ခံယူချက် ခိုင်မာပြီး ထိုအရာကို ဝန်ထမ်းများထံလည်း အမြဲတမ်း ပြောကြားပြီး နားဝင်အောင် လုပ်ဆောင်ခြင်း" ၊ "စိတ်ပိုင်းဖြတ်၍ လက်အောက်ငယ်သားများထံ အလုပ်ကို အပ်နှံပြီး ကိုယ်ပိုင်တာဝန်နှင့် လုပ်ပိုင်ခွင့်အာဏာဖြင့် လွတ်လပ်စွာ လုပ်ကိုင်နိုင်စေရန် ပြုလုပ်ခြင်း" ဟု ပြောကြားခဲ့သည်။

လူသားများသည် ကိုယ်တိုင်ဘာလုပ်သင့်သည်ကို သိရှိ၍ အောင်မြင်မှု၏ အရေးပါမှုကို သတိပြုမိလာပြီး ပြင်းပြသောလှုံဆော်မှုကို ခံစားရသည့်အခါ၊ ၎င်းတို့၏ ဉာဏ်ပညာကို ညှစ်ထုတ်လိုစိတ်ရှိပြီး တီထွင်ဉာဏ်ပညာအားဖြင့် ကြီးမားသည့် စွမ်းအားများကို အသုံးချလိုကြသည်။ ထို့ကြောင့် အထက်လူကြီးသည် မိမိ၏လက်အောက်ငယ်သားများအား အလုပ်ကို တာဝန်အပ်နှံခြင်း အပြင် အထက်ပါ လှုံ့ဆော်မှုဖြစ်ပေါ်လာစေရန်အတွက် လုပ်ဆောင်ရန် လိုအပ်သည်။ ထိုသို့ လုပ်ဆောင်ခြင်းဖြင့် လူတစ်ဦးစီသည် မိမိလုပ်ကိုင်ရကျိုးနပ်သည်ကို ခံစားရရှိပြီး အလုပ်မှတစ်ဆင့် ပျော်ရွှင်မှုနှင့် ဝမ်းမြောက်မှု ဖြစ်ပေါ်လာစေသည့် အယူအဆသည် ကိုယ်တိုင် တာဝန်ယူမှုရှိသော စီမံခန့်ခွဲမှု၏ အခြေခံဖြစ်သည်။

တည်ထောင်သူသည် ဝန်ထမ်းတစ်ဦးစီ၏ အလုပ်အပေါ် ရှုမြင်ပုံကို "ဝန်ထမ်း၏ စီးပွားရေးလုပ်ငန်း" ဟူသော ဝေါဟာရဖြင့်ဖော်ပြပြီး "လူတစ်ဦးစီသည် လွတ်လပ်သောစီမံခန့်ခွဲမှုအဖွဲ့တစ်ခု၏ အဓိကဇာတ်ကောင်နှင့် စီမံခန့်ခွဲသူဖြစ်သည်" ဟူသော စိတ်ဓာတ်ဖြင့် အလုပ်လုပ်ဆောင်ခြင်း၊ အကြောင်းအရာများအပေါ် ထိုစိတ်ဓာတ်ဖြင့် ရှုမြင်၍ အဆုံးအဖြတ်ချက်ချစေချင်သည်ဟု တောင်းဆိုခဲ့သည်။

ဝန်ထမ်း၏ စီးပွားရေးလုပ်ငန်းကို လက်တွေ့ဖော်ဆောင်ရာတွင် တာဝန်ထမ်းဆောင်သူ တစ်ဦးစီသည် အစွမ်းရှိသမျှကို အကုန်ထုတ်၍ ပိုမိုကောင်းမွန်သော နည်းလမ်းများနှင့် အဆင့်များကို ဖန်တီးကာ သတ္တိရှိရှိ အကောင်အထည်ဖော်၍ ပိုမိုကောင်းမွန်သော ရလဒ်များ ရရှိရန် တာဝန်ရှိပြီး ဤကဲ့သို့သော တာဝန်သိစိတ်ရှိရန် မရှိမဖြစ်လိုအပ်ပါသည်။

မိုက်ခရိုဝေ့ဖ်မီးဖိုလုပ်ငန်းကို တည်ထောင်ချိန်မှ တာဝန်ယူခဲ့ပြီး ကမ္ဘာလုံးဆိုင်ရာလုပ်ငန်းအဖြစ် မြှင့်တင်ကာ နောက်ပိုင်းတွင် Matsushita Housing Equipment ၏ ဥက္ကဌတာဝန်ကို ထမ်းဆောင်ခဲ့သော Morimasa Ogawa သည် ဤတာဝန်ယူစိတ်ကို "ကိုယ်တိုင် တာဝန်ယူစိတ်" ဟု အမည်ပေးခဲ့ပါသည်။ ကျွန်ုပ်တို့တစ်ဦးစီတိုင်းတွင် ဤကိုယ်ပိုင်တာဝန်ယူမှုအသိစိတ်ရှိရန် လိုအပ်ပြီး ဝန်ထမ်းစီးပွားရေးကို လက်တွေ့ဖော်ဆောင်ရမည်ဖြစ်သည်။

ထို့အပြင် တည်ထောင်သူသည် ဝန်ထမ်းငယ်များအား ဝန်ထမ်း၏ စီးပွားရေးလုပ်ငန်းအကြောင်း ပြောပြသောအခါတွင် လွတ်လပ်သော စီမံခန့်ခွဲမှုအဖွဲ့အား "ညဘက်ရောင်းသည့် အုဒွန်းခေါက်ဆွဲဆိုင်*" ဖြင့် ဥပမာပေးပြီး အုဒွန်းခေါက်ဆွဲကို တက်တက်ကြွကြွရောင်းချပြီး ဖောက်သည်အား "ဒီနေ့ အရသာက ဘယ်လိုရှိပါလဲ" ဟု မေးကာ ဖောက်သည်၏ ဖြေကြားသံကို အခြေခံပြီး တိုးတက်ပြင်ဆင်မှုများပြုလုပ်ခြင်းကဲ့သို့ အားထုတ်မှုနှင့် စိတ်အားထက်သန်မှု လိုအပ်ကြောင်း ဆိုခဲ့သည်။

ဥပမာအားဖြင့် အဖွဲ့အစည်းကြီးတစ်ခု၏ အဖွဲ့ဝင်တစ်ယောက်ဖြစ်နေလျှင်ပင် ပေးထားသည့် အလုပ်တစ်ခုကိုလုပ်ပြီး သတ်မှတ်ထားသော အလုပ်လုပ်ဆောင်နည်းနှင့် လုပ်ထုံးလုပ်နည်းကို လိုက်နာရုံဖြင့် မလုံလောက်ပါ။ မိမိတို့၏ အလုပ်ကို ပိုမိုကောင်းမွန်သောအလုပ်ဖြစ်စေရန်အတွက် ကျွန်ုပ်တို့တစ်ဦးစီတိုင်းသည် တွေးတောပြီး တိုးတက်မှုများ ဆက်လက်လုပ်ဆောင်သွားရန် မဖြစ်မနေ လိုအပ်ပါသည်။

နေ့စဉ်နှင့်အမျှ တိုးတက်ပြောင်းလဲနေသော လူ့အဖွဲ့အစည်းတွင် မိမိတစ်ဦးတည်း၏ တွေးခေါ်ပုံနှင့် ရှုထောင့်ဖြင့် လုပ်ဆောင်ပါက ဖောက်သည်များထံမှ ဆက်လက်ရွေးချယ်ခံရနိုင်မည် မဟုတ်ပါ။ "ယနေ့၏ အကောင်းဆုံးသည် မနက်ဖြန်၏ အကောင်းဆုံးမဟုတ်နိုင်။ မနက်ဖြန်တွင် မနက်ဖြန်၏ အကောင်းဆုံးကို ဖန်တီးရမည်" ဟု တွေးပြီး အမြင့်ကို အမြဲတမ်းရည်မှန်းထားရန် လိုအပ်သည်။ * ညဘက်တွင် လှည့်လည်ရောင်းချသော အုဒွန်းခေါက်ဆွဲဆိုင်။ မြည်သောဝီစီသံကို " ညဘက်အော်သံ (Yonaki) " ဟု ခေါ်ကြသည်။

ကိုယ်တိုင်တာဝန်ယူမှုရှိသောစီမံခန့်ခွဲမှုအတွေးအခေါ်ကို ပုံဖော်ခဲ့သည်မှာ ၁၉၃၃ ခုနှစ်တွင် စတင် မိတ်ဆက်ခဲ့သော "လုပ်ငန်းခွဲဝေမှုစနစ်" ဖြစ်သည်။ လုပ်ငန်းခွဲဝေမှုစနစ်သည် ကုမ္ပဏီတစ်ခုလုံးကို ထုတ်ကုန်တစ်ခုချင်းအလိုက် ခွဲခြမ်းစိတ်ဖြာကာ လုပ်ငန်းခွဲတစ်ခုစီတွင် ဖွံ့ဖြိုးတိုးတက်မှု၊ ထုတ်လုပ်မှုနှင့် အရောင်းမှ အမြတ်အစွန်းများကို စီမံခန့်ခွဲခြင်းအထိ အရာအားလုံးအတွက် တာဝန်ယူပေးသည့် လွတ်လပ်ပြီး အကျိုးအမြတ်ရှိသော အဖွဲ့အစည်းစနစ်ဖြစ်သည်။ လုပ်ငန်းခွဲများသည် ၎င်းတို့၏ကိုယ်တိုင်တာဝန်ယူမှုရှိသော စီမံခန့်ခွဲမှုရှိရန် လိုအပ်ပြီး ထိုစီမံခန့်ခွဲမှုသည် လုပ်ငန်းခွဲမန်နေဂျာများနှင့် ဝန်ထမ်းများအား ဖွံ့ဖြိုးတိုးတက်လာစေပြီး ဤသို့ဖြင့် ယနေ့ Panasonic Group တည်ရှိနေခြင်းဖြစ်ပါသည်။